Xoghayaha guud ee Qaramada Midoobay Ban Ki-Moon ayaa shalay kaga dhawaaqay dalka Burundi ergayga cusub ee u fadhin doona Qaramada Midoobay dalka Soomaalia kaasoo loo magacaabay Augustine Mahiga oo ah nin u dhashay dalka Tanzania.

Augustine Mahiga, ayaa in mudda ah ahaa safiirka dalka Tanzania u qaabilsan Qaramada Midoobay tan iyo sanadi 2003, hada wuxuu madax uga noqonayaa Xoghayaha Guud ee UN-ka arrimaha ka taagan dalka Somalia, waxana xafiiskiisa uu noqonayaa Magaalada Nairobi.

Qaramada Midoobay ayaa dalalka Africa ku cadaadineyso sidii ay u kordhin lahaayeen ciidamada nabad ilaalinta ee hada ka jooga Soomaaliya, waxaa ay hada UN-ka bixiyaan lacagaha ku baxa ciidamada AMISOM ee ku sugan magaalada Muqdisho.

Mahiga ayaa bedeli doona ergaygi hore ee Qaramada Midoobay u qaabilsanaa Somalia Ahmedou Ould-Abdallah oo ah nin kasoo jeeda dalka Mauritania, Mr Cabdalla wuxuu xilkaasi qabtay sanadi 2007.

Dadka lafa gura siyaasada ayaa waxa ay Axmed Walad Cabdalla ku tiriyaan ninkii ugu wanaagsanaa ee soo mara Soomaaliya marka loo eego wakiiladii ka horeeyey ee ka socday Qaramada Midoobay ee loo soo magacaabay Somalia.

W/D Cabdi Waheliye